Mjaftoi një ngatërresë në një konferencë për shtyp që zëvendësministri i Shëndetësisë në Taxhikistan të shkarkohej menjëherë nga detyra. Samariddin Alizoda ngatërroi Korene e Jugut me atë të Veriut, dhe videoja u bë virale. Ai kishte harruar edhe emrat e përfaqësuesve të UNICEF-it dhe të Organizatës Botërore të Shëndetësisë, gjatë një konference në Dushanbe. Presidenti Taxhik, Emomali Rahmon vendosi lirimin nga detyra të zyrtarit të lartë pas konferencës ku ai kishte njoftuar planet e autoriteteve lidhur me shpërndarjen e vaksinës kundër koronavirusit të AstraZeneca/Oxford. Përdoruesit e internetit zgjodhen fjalën “katastrofë” për të përshkruar paraqitjen e zv/ministrit, i cili tha se vaksina e AstraZenecas është zhvilluar në Angli dhe po prodhohet në Belgjikë, në Indi dhe Kore të Veriut. Pasi gazetarët e korigjuan duke i thënë se kjo vaksinë prodhohet në Kore të Jugut, Alizoda u përgjigj:“Po, e Jugut, Koreja e Jugut”, e pastaj shtoi: “ Po fundja, cfare ndryshimi ka? Koreja është Kore". Shumë nga pjesëmarrësit në këtë konferencë, pas kësaj deklarate, filluan të qeshnin. Alizoda, 55 vjeç, që është doktor me profesion, ishte emëruar në postin e zëvendësministrit në maj të vitit 2020, teksa rastet me koronavirus kishin filluar që të rriteshin në Taxhikistan.