Pas aksidentit tragjik të ndodhur në lagjen 13 në Durrës, ku humbën jetën dy fëmijë të mitur dhe u plagos një tjetër, një tjetër masë është marrë në radhët e uniformave blu, ku drejtori i Përgjithshëm, Skënder Hita ka vendosur shkarkimin nga detyra të Afrim Tafës, drejtorit vendor të Policisë së Durrësit. Tafa, fillimisht, u pezullua nga detyra së bashku me dy zyrtarë të tjerë të lartë, zëvendësdrejtorin për Rendin dhe Sigurinë Publike, Kryekomisar Zija Sulaj, si dhe shefin e Sektorit të Policisë Rrugore, Kryekomisar Kreshnik Skëndon. S Sipas njoftimit zyrtar, pezullimi u bë për performancë të dobët në përmbushjen e detyrave. Ndërkohë, drejtimi i përkohshëm i Policisë së qarkut të Durrësit i është besuar Ervin Hodajt, ndërsa Blerim Laçi është caktuar në krye të Sektorit të Qarkullimit Rrugor. Ngjarja ka shkaktuar reagim të fortë në opinionin publik. Banorë të zonës kanë fajësuar institucionet vendore dhe policinë për mungesë të sigurisë rrugore, duke nisur edhe protesta.