Shtëpia e Bardhë po kërcënon me shkarkime masive për programet që nuk kanë financim alternativ dhe nuk përputhen me "prioritetet" e Trumpit. Ajo u ka thënë agjencive të saj të përgatiten për shkarkime masive nëse Kongresi nuk shmang mbylljen e qeverisë javën e ardhshme, sipas një memoje të siguruar nga mediat amerikane. Në memo, Zyra e Buxhetit dhe Menaxhimit udhëzon agjencitë federale të fillojnë hartimin e planeve të "reduktimit të forcës" për programet, financimi i të cilave do të përfundojë nëse Kongresi nuk arrin afatin e buxhetit të 30 shtatorit. Paralajmërimi erdhi pasi Trump refuzoi të martën një takim me demokratët që po kërkojnë të sigurojnë fonde për kujdesin shëndetësor si pjesë e negociatave të buxhetit. "Ne mbetemi shpresëplotë se demokratët në Kongres nuk do të shkaktojnë një mbyllje të qeverisë dhe hapat e përshkruara më sipër nuk do të jenë të nevojshëm", thuhet në memo. Dokumenti i zyrës së buxhetit paralajmëron për shkarkime të përhershme veçanërisht për programet, projektet dhe aktivitetet federale që nuk kanë burime alternative financimi dhe "nuk janë në përputhje me prioritetet e Presidentit". Shumë agjenci qeveritare federale mbështeten në financimin vjetor të miratuar nga Kongresi. Çdo vit, këto agjenci paraqesin kërkesat e tyre, të cilat Kongresi duhet t'i miratojë, dhe presidenti duhet të nënshkruajë legjislacionin e buxhetit për vitin e ardhshëm fiskal. Një mbyllje e qeverisë ndodh nëse nuk arrihet një marrëveshje deri në fillim të vitit fiskal më 1 tetor, që do të thotë se të gjitha funksionet jo-thelbësore do të ndalen.