Elon Musk dhe aleatët e tij i kanë kaluar dy javët e fundit duke ndërhyrë me shpejtësi në agjenci të shumta qeveritare, duke shkaktuar konfuzion dhe kaos dhe duke ngritur pikëpyetje nëse një biznesmen i pazgjedhur mund të ushtrojë këtë lloj autoriteti, në dukje duke hedhur poshtë ligje dhe programe të vulosura nga Kongresi. Gjatë disa ditëve të fundit, personeli i lidhur me Musk ka fituar akses të plotë në sistemin e pagesave të Thesarit, ka kërcënuar se do të mbyllë Agjencinë Amerikane për Zhvillim Ndërkombëtar USAID, u ka ofruar të gjithë punonjësve federalë një lloj plani "blerjeje" dhe në disa agjenci, janë pezulluar apo transferuar nëpunës civilë të karrierës, në disa raste duke i mbyllur jashtë zyrave ose duke iu mbajtur larg kompjuterëve të tyre. Të marra së bashku, lëvizjet e Musk përfaqësojnë një përpjekje të paprecedentë për të zgjeruar fuqinë e degës ekzekutive me pak respekt për ligjet apo procedurat. Musk, njeriu më i pasur në botë, ka dhjetëra miliarda dollarë në kontrata qeveritare, dhe tani, ka edhe akses në punët e brendshme të qeverisë federale. Kathleen Clark, pedagoge e drejtësisë në universitetin e uashingtonit, thotë për CNN se është e vështirë të gjesh dikë që ka ushtruar këtë lloj pushteti dhe kontrolli mbi operacionet e qeverisë, sic ka bërë Elon Musk javën e fundit. Cështja nëse Musk do të respektojë rregullat federale të konfliktit të interesit, apo nëse do ta bëjë një gjë të tillë administrata Trump, ka tërhequr vëmendjen e demokratëve dhe grupeve mbikqyrëse. Shumë procese gjyqësore janë në zhvillim e sipër dhe shumë të tjerë priten të vijnë.