Gjatë 24 orëve të fundit janë raportuar 10 vatra zjarri, të cilat tashmë janë shuar plotësisht. Sipas njoftimit të Ministrisë së Mbrojtjes, në të gjithë territorin e vendit nuk ka asnjë vatër aktive dhe asnjë vatër nën mbikëqyrje. Për menaxhimin dhe shuarjen e zjarreve u angazhuan 174 forca operacionale, si edhe 14 automjete zjarrfikëse. Në mbështetje të operacioneve kanë qenë edhe Forcat e Armatosura, me 27 efektivë, 3 mjete dhe një ambulancë. Në qarkun e Lezhës është shuar vatra në fshatin Gallatë të Bashkisë Kurbin, e cila kishte ardhur nga territori i Bashkisë Mat. Ndërsa në qarkun e Elbasanit është neutralizuar zjarri në Librazhd Katund, ku flakët kishin prekur bimësi me pisha. Në qarkun Gjirokastër është shuar zjarri në Bularat të Bashkisë Dropull, ndërkohë në qarkun Dibër janë shuar vatrat në Lundre–Madhesh, Cerrujë/Mali i Allushit dhe Selishtë. Edhe në qarkun Fier situata është normalizuar, pasi janë shuar zjarret në Bitaj të Bashkisë Lushnje dhe në Rërës të Bashkisë Patos. Për shuarjen e flakëve kanë ndihmuar edhe reshjet intensive të shiut gjatë natës që kanë kapluar disa zona të vendit këto dy ditët e fundit.