Një aksion antidrogë u zhvillua në Kavajë, prej të cilit 9 persona ranë në pranga dhe 3 të tjerë u shpallën në kërkim nga policia. Operacioni i koduar“Cleaning 4” u përqendrua në goditjen e shitjes së lëndëve narkotike në afërsi të shkollave, për të cilin policia kishte zhvilluar hetime prej disa muajsh. Në njoftimin zyrtar, Policia ka bërë të ditur se janë ekzekutur 9 masa arrest me burg nga 12 shtetas të akuzuar për veprën penale “Prodhimi dhe shitja e narkotikëve”. Konkretisht, u ekzekutua masa e sigurisë “Arrest në burg”, për 9 shtetas të moshave 20 - 48 vjeç, të gjithë banues në Kavajë. Nga hetimet dyshohet se këta shtetas, në bashkëpunim me njëri-tjetrin, ushtronin aktivitetin e paligjshëm të shitjes së lëndëve narkotike pranë shkollave të qytetit të Kavajës. Gjatë operacionit u sekuestruan në cilësinë e provës materiale sasi kokaine dhe kanabisi, të ndara në doza, si dhe disa celularë.