Shërbimi Informativ i Shtetit pritet të zgjerojë akoma dhe më shumë fushën e veprimtarisë së tij. Një projektligji I cili u miratua në Këshillin e Ministrave për disa shtesa dhe ndryshime në ligjin për Shërbimin informativ kombëtar, pritet të kaloj në Kuvend për diskutim e miratim, ku parashikohet që SHISH të ketë në fokus edhe kërcënimet ndaj sigurisë ekonomike, asaj kibernetike dhe hibride, me impakt në mjedisin e sigurisë së vendit. Agjentët e SHISH tashmë do të kenë si prioritet edhe mbledhjen e informacioneve për kërcënimet ndaj infrastrukturës kritike të vendit. Po ashtu me ndryshimet e propozuara në qeveria “SHISH-i ka të drejtë për akses në bazat e të dhënave shtetërore, i cili është i kufizuar sipas funksionit ligjor dhe rregullohet me marrëveshje ndërinstitucionale”. Ndërkohë që punonjësit e SHISH-it, propozohet që të, përjashtohen nga detyrimi për deklarimin e të ardhurave të përftuara nga paga, si dhe deklarimin e kontrollin e pasurive, të detyrimeve financiare të të zgjedhurve dhe të disa nëpunësve publikë. “Kontrolli vjetor i tyre kryhet nga struktura e posaçme në Shërbimin Informativ të Shtetit, sipas procedurave të përcaktuara me akt të brendshëm të drejtorit të SHISH-it”, thuhet në projektligj. Sa I takon pagës nisma ligjore parashikon ndryshime edhe për titullarët e këtij institucioni. “Drejtori dhe Zëvendësdrejtori i SHISH-it përfitojnë pagë bazë, shtesë për vjetërsi dhe shtesë për natyrë të veçantë pune. Trajtimi financiar i tyre përcaktohet me vendim të Këshillit të Ministrave. Drejtori dhe Zëvendësdrejtori trajtohen nga legjislacioni për pensionet shtetërore suplementare të personave që kryejnë funksione kushtetuese dhe të punonjësve të shtetit.”, thuhet në draftin ligjor që qeveria I ka përcjellë Kuvendit për diskutim e më pas miratim.