Konsumi dhe ndërtimi udhëheqin rritjen ekonomike në vend. Për periudhën prill – qershor ky tregues rezulton të jetë rritur me 3,2 për qind krahasuar me po të njëjtën periudhë të një viti më parë. Shtylla kryesore të ekonomisë, të cilat kanë një peshë kryesore në rritjen ekonomike janë ndërtimi dhe pasuritë e paluajtshme. Përkatësisht ndërtimi ka shënuar rritje me 1,43 përqind, ndërsa pasuritë e paluajtshme me 0,72 përqind. Konsumi final i popullatës, i cili përbën peshën kryesore të shpenzimeve në ekonomi u rrit me katër për qind. Konsumi i qeverisë gjithashtu ka njohur rritje të konsiderueshme me 9 për qind. Tremujori i dytë i këtij viti përkon me periudhën elektorale, miratimin e rrijes së pagës minimale dhe mesatare për administratën publike si dhe me disa investime të cilat kanë ndikuar në rritjen e shpenzimeve buxhetore. Bilanci tregtar rezulton negative pasi sipas të dhënave eksportet e mallrave dhe shërbimeve u ulën me 1,48 për qind, ndërsa importet u rritën me 2,42 %. Disa nga degët kryesore të ekonomisë përsuan rënie, duke filluar nga bujqësia që shënoi një rënie prej 0,04 për qind dhe industria, energjia dhe uji prej 2,37 për qind.