Ekonomia shqiptare ka humbur rreth 400 milionë euro në tremujorin e parë të vitit 2020, si rrjedhojë e tërmetit dhe pandemisë që detyroi një mbyllje të ekonomisë nga mesi i muajit mars. Sipas raportit të Eurostat për vendet anëtare, ku përfshihen dhe shtetet e rajonit. Prodhimi i Brendshëm Bruto me çmime tregu për Shqipërinë zbriti në 3 miliardë euro, nga 3.4 miliardë euro në tremujorin e mëparshëm, duke zbritur në nivelin më të ulët që nga tremujori i parë 2018. Gjithashtu INSTAT ka raportuar se Produkti i Brendshëm Bruto në tremujorin e parë të vitit 2020 vlerësohet me rënie prej 2,52 %, kundrejt tremujorit të parë të vitit 2019. Tërmeti i fundit të vitit të kaluar, që frenoi sektorin e ndërtimit dhe mbyllja e ekonomisë në gjysmën e dytë të muajit mars, e kanë çuar ekonominë në territor negativ në tremujorin e parë të vitit.