Kanceri është kthyer në sëmundjen më të rrezikshme që po përhapet çdo ditë, jo vetëm në Shqipëri, por edhe në Kosovë. Sipas statistikave të reja, vetëm në harkun kohor të 2 muajve, pra në janar dhe shkurt, janë shënuar mbi 300 raste të reja me kancer. Kësisoj krahasuar me të njëjtën periudhë të një viti më parë, është shënuar rritje me mbi 10%. Kanceri i gjirit vazhdon të dominojë tek gratë, tek meshkujt është ai i mushkërive. Drejtori i Klinikës së Onkologjisë në Qendrën Klinike Universitare të Kosovës (QKUK), Ilir Kurtishi, në një intervistë për KosovaPress thotë se numri i rasteve të reja me kancer është trend në rritje. Kurtishi përmend disa nga faktorët që ndikojnë në shtimin e rasteve me këtë sëmundje malinje, duke përfshirë ata gjenetikë, të ambientit të jashtëm, moshën, gjininë e të tjerë. Nga ana tjetër sipas tij shqetësues është fakti se mbi 50 për qind e rasteve me kancer që lajmërohen në klinikë për herë të parë, janë në stade të avansuara të sëmundjes.