Një 48-vjeçar i shpallur i dënuar me 13 vite burgim për shfrytëzim prostitucioni e skllavërim nga autoritetet italiane u kap në Tiranë nga Forca e Posaçme Operacionale. Bekim Nikolli u prangos gjatë operacionit të koduar Fast pas informacioneve të shkëmbyera me autoritetet italiane. Sipas policisë ai ishte shpallur në kërkim ndërkombëtar, pasi Gjykata e Apelit e Napolit, Itali, në nëntor të vitit 2021, e ka dënuar me burg për veprat penale "Shfrytëzimi i prostitucionit" dhe "Skllavërimi/Nënshtrimi", të parashikuara nga legjislacioni penal italian. Nga informacionet e autoriteteve italiane rezulton se 48-vjeçari, në bashkëpunim me persona të tjerë, shfrytëzonte për prostitucion shtetase të futura në mënyrë të paligjshme në Itali. Gjithashtu, ai dyshohet se ushtronte dhunë ndaj tyre, me qëllim maksimizimin e fitimeve nga shfrytëzimi për prostitucion dhe mbajtjen e tyre nën kontroll. Interpol Tirana po vijon procedurat për ekstradimin e Bekim Nikollit drejt Italisë.