Tensionet në hyrjen e kantierit të aeroportit të Vlorës janë përshkallëzuar këtë të mërkurës mes dy aksionerëve të kompanisë VIA-s. Rojet e sigurisë nuk kanë lejuar punonjësit e kompanisë MABCO të hyjnë në ambientet e terminalit dhe në zonën e aeroportit për të vijuar punimet, ku kamionët e kompanisë 2A Grup vijojnë të mbajnë të bllokuar hyrjet në kantier. Në vendngjarje ka mbërritur edhe Emin Pacolli presidenti i Mabco dhe vëllai i vogël i Bexhet Pacollit, i cili ka kërkuar ndërhyrjen e Policisë së Shtetit. Forcat e policisë kanë shkuar në kantier, por sipas deklarimeve të bëra në terren, nuk kanë ndërmarrë veprime për zhbllokimin e situatës, duke argumentuar se janë në pritje të urdhrave dhe procedurave përkatëse nga organet kompetente.