Eduart Buçeza, 24 vjeç është paraqitur mbrëmjen e të martës në spitalin e Durrësit, me një plagë në këmbë të shkaktuar nga arma e zjarrit. Pas njoftimit se në Spitalin Rajonal ishte paraqitur për të marrë mjekim 24-vjeçari i plagosur, specialistët për Hetimin e Krimeve të Komisariatit të Policisë Durrës, në bashkëpunim me specialistët e Sektorit për Krimet e Rënda shkuan në vendin e ngjarjes, në oborrin e banesës së Eduart Buçezës, në fshatin Shënavlash, ku në drejtimin e prokurorit, kryen veprimet hetimore për zbardhjen e rrethanave të rastit dhe identifikimin e autorit. Pas hetimeve, rezultoi se Eduart Buçeza ishte plagosur nga 33-vjeçari me iniciale I. B. kushëri me 24-vjeçarin, gjatë një konflikti të çastit për motive të dobëta. Ndërsa i riu ndodhet nën kujdesin e mjekëve në spital, policia ka ngritur pika kontrolli në akse të ndryshme rrugore dhe vijon kërkimet në zonë për kapjen e autorit.