Rusia do të shënjestrojë Poloninë dhe vendet baltike nëse do të vazhdojë të ndihet e kërcënuar nga NATO, ka paralajmëruar shefi i spiunazhit të Vladimir Putin. Sergei Naryshkin, Drejtor i Shërbimit të Inteligjencës së Jashtme Ruse, fajësoi "vendet provokatore" për afrimin e Evropës drejt një konflikti të gjithanshëm me Kremlinin. Naryshkin pohoi në një deklaratë se Polonia dhe vendet baltike ende nuk e kanë kuptuar plotësisht se çfarë do të thotë vërtet për ta një konflikt midis NATO-s dhe Rusisë. “Në rast agresioni të Aleancës së Atlantikut të Veriut kundër Rusisë, dëmi do t'i shkaktohet, natyrisht, të gjithë bllokut të NATO-s. Por në një masë më të madhe, të parët që do të vuajnë pasojat do të jenë bartësit e ideve të tilla në qarqet politike të Polonisë dhe vendeve baltike”, tha Naryshkin. Citimet e tij u raportuan fillimisht nga agjencia pro-Kremlinit TASS, pasi Naryshkin u takua me liderin bjellorus Alexander Lukashenko. Naryshkin akuzoi gjithashtu Poloninë dhe shtetet baltike se janë "shumë agresive" përsa i takon gjuhës së përdorur prej tyre. Ai u ndal tek plani i Varshavës për të vendosur deri në dy milionë mina antitank përgjatë kufijve të saj me Bjellorusinë dhe rajonin e Kaliningradit të Rusisë.