Kyetari I Partisë Demokratike ka akuzuar qeverinë Rama se e ka çuar në kolaps sistemin shëndetësor. Duke iu referuar dy raporteve të institucioneve ndërkombëtare Basha shprehet se vendi ynë ka më pak mjekë në raport me popullsinë, 1.2 mjekë për 1000 banorë, dhe se ata janë më pak të paguar krahasuar me vendet e rajonit. “Mungesa e mbështetjes ka larguar me mijëra mjekë dhe infermierë nga vendi, duke bërë që Shqipëria të ketë numrin më të ulët të mjekëve për banorë në rajon. Si rrjedhojë e largimeve masive të personelit shëndetësor gjatë viteve të fundit, zona të tëra në Shqipëri janë pa mjekë dhe pa shërbim për qytetarët. Dështimi me shëndetësinë këto 7 vjet u pa qartë nga të gjithë edhe në menaxhimin e pandemisë. Ende sot, me rritjen e përditshme të numrit të të prekurve nga COVID-19, deklaratat për hapjen e 2 spitaleve të reja COVID mbeten pjesë e propagandës, ndërsa në disa raste personeli shëndetësor nuk ka marrë shpërblimet e premtuara”, thekson ndër të tjera Basha.