Një ndërtesë pesëkatëshe banimi është shembur në Delhit, duke shkaktuar viktima, teksa dhjetëra persona, kryesisht studentë, kanë mbetur të bllokuar nën rrënoja. Ngjarja ndodhi rreth orës 13:30 me kohën lokale, ndërsa dëshmitarët thanë se në ndërtesë mund të ndodheshin deri në 50 persona. Sipas policisë, të paktën një person ka humbur jetën, dy të tjerë janë në gjendje kritike dhe gjashtë persona janë shpëtuar deri tani. Në ndërtesë, e cila shërbente edhe si hostel për studentë pranë Universitetit të Delhit, po kryheshin punime ndërtimi në bodrum. Disa prej personave të bllokuar raportohet se kanë telefonuar nga poshtë rrënojave për të kërkuar ndihmë. Ekipet e shpëtimit dhe Forca Kombëtare e Reagimit ndaj Fatkeqësive vijojnë operacionet për nxjerrjen e personave të bllokuar. Një ndërtesë ngjitur është evakuuar si masë paraprake, ndërsa raportohet se edhe një tjetër strukturë pranë ka pësuar dëmtime. Dëshmitarë kanë ngritur dyshime se punimet në bodrum mund të kenë ndikuar në shembjen e ndërtesës, duke pretenduar se strukturat mbajtëse në pjesën e poshtme ishin të dobëta. Autoritetet kanë nisur hetimet për përcaktimin e shkaqeve të incidentit, ndërsa policia është në kërkim të pronarit të ndërtesës. Organizatat studentore kanë kërkuar hetim të plotë dhe marrjen e përgjegjësive nga personat që mund të kenë shkelur rregullat e sigurisë.