Rumania dhe Bullgaria hoqën kontrollet kufitare tokësore duke u bërë anëtarë të plotë të zonës së udhëtimit të lirë Shengen të Bashkimit Evropian, të mërkurën, duke iu bashkuar kështu një blloku të zgjeruar të vendeve, banorët e të cilëve mund të udhëtojnë pa kontrolle pasaportash. Fishekzjarret ndriçuan qiellin në një vendkalim afër qytetit kufitar bullgar Ruse, menjëherë pas mbërritjes së mesnatës, ndërsa ministrat e brendshëm bullgar dhe rumunë ngritën simbolikisht një pengesë në Urën e Miqësisë që shtrihet mbi lumin Danub. Kalimi është një pikë kryesore tranziti për tregtinë ndërkombëtare. Kontrollet për udhëtimet ajrore dhe detare nga Bullgaria dhe Rumania u hoqën në mars 2024, por kontrollet tokësore vazhduan derisa Austria muajin e kaluar hoqi veton që kishte vendosur me arsyetimin se nevojitej më shumë punë prej këtyre dy shteteve për të ndaluar migrimin e parregullt. Kontrollet kufitare midis Francës, Gjermanisë, Belgjikës, Holandës dhe Luksemburgut u hoqën për herë të parë në 1985. Zona Shengen tani mbulon 25 nga 27 shtetet anëtare të BE-së, si dhe Islandën, Lihtenshtajnin, Norvegjinë dhe Zvicrën.