Mbretëria e Bashkuar pret gjatë ditës një takim me dyer të mbyllura të liderëve të lartë ushtarakë nga "koalicioni i të vullnetshmëve", ndërsa ata hartojnë planet për një forcë paqeruajtëse të propozuar për Ukrainën. Më shumë se 20 vende mendohet të jenë të përfshira. Kryeministri Keir Starmer pritet të marrë pjesë në takim gjatë pasdites, pas vizitës së parë në Barroë, ku ai do të inaugurojë një prej nëndetëseve të gjeneratës së ardhshme, të armatosura me armë bërthamore, të Britanisë së madhe. Planet për një forcë paqeruajtëse të udhëhequr nga Perëndimi për Ukrainën thuhet se po kalojnë në një fazë operacionale. Oficerët e lartë ushtarakë nga vendet që përbëjnë "koalicionin e të vullnetshmëve", të udhëhequr nga Britania dhe Franca, do të diskutojnë se si do të funksionojë kjo në praktikë. Ministri i Forcave të Armatosura Luke Pollard tha se ata duan që koalicioni të jetë një "forcë e besueshme" që do t'i lejojë Ukrainës "të gëzojë një paqe të qëndrueshme" dhe "të rindërtohet dhe riarmatoset". “Vladimir Putin nuk do të ndalet nëse fiton në Ukrainë. Nëse ai nënshtron Ukrainën, që është plani i tij i hershëm, ai thjesht do të riarmatoset dhe do të shikojë se ku tjetër do të godasë", i tha ai BBC. Pollard tha se sigurimi i paqes në Ukrainë mund të nënkuptojë "disa trupa në terren", por forca gjithashtu "do të ketë tipare edhe të forcave ajrore dhe detare". Sidoqoftë mbeten disa pengesa të mëdha. Presidenti rus Vladimir Putin ka thënë se Moska nuk do të tolerojë praninë e asnjë trupe anëtare të NATO-s në Ukrainë, pavarësisht nga roli i tyre. SHBA duket gjithashtu se nuk ka dëshirë të sigurojë mbulimin ajror që nevojitet.