Kina i bëri thirrje Shteteve të Bashkuara të ndalojnë zgjerimin e kapaciteteve ushtarake në hapësirë, pasi Uashingtoni pranoi se ka armë të vendosura në orbitë, ndërsa mediat shtetërore kineze paralajmëruan se ky veprim mund të nxisë një garë globale armatimesh. Zëdhënësi i Ministrisë së Jashtme kineze, deklaroi se Pekini kundërshton militarizimin e hapësirës dhe shndërrimin e saj në një zonë lufte. "Ne u bëjmë thirrje SHBA-së të ndalojnë zgjerimin e pranisë ushtarake në hapësirë dhe të ruajnë stabilitetin strategjik global përmes veprimeve konkrete," tha zëdhënësi gjatë një konference të rregullt për shtyp. Sekretari amerikan i Forcave Ajrore, Troy Meink, tha të hënën se Shtetet e Bashkuara zotërojnë "armë për kontrollin e hapësirës në orbitë, të afta për të mbrojtur Forcën e Përbashkët kundër veprimeve armiqësore"; ky ishte pranimi më i qartë deri më tani nga një zyrtar i Pentagonit lidhur me praninë e armëve amerikane në orbitë. Meink nuk i specifikoi llojet e këtyre armëve. Gazeta shtetërore kineze "Global Times" shkroi të martën se ky zbulim nxori në pah atë që ajo e quajti synim të Uashingtonit për "hegjemoni hapësinore" dhe krijon rrezikun e nxitjes së një gare globale të armatimeve në hapësirë. Javën e kaluar, agjencia shtetërore e lajmeve "Xinhua", në një analizë mbi një stërvitje ushtarake amerikane në orbitë, vlerësoi se përpjekja e Uashingtonit për të militarizuar këtë fushë rrezikonte të krijonte një "dilemë sigurie", duke i detyruar vendet e tjera të forconin kapacitetet kundër-hapësinore, të cilat Shtetet e Bashkuara më pas do t'i konsideronin si kërcënime të reja.