Në SHBA po bisedohet për krijimin e një force shumëkombëshe dhe dërgimin e saj në Gaza pasi Izraeli të crrënjosë hamasin – konfirmuan dy senatorë, në shenjën më të qartë se SHBA dhe partnerët e saj po mendohen seriozisht për të dërguar trupa të huaja në enklavë. Senatorët Chris Van Hollen dhe Richard Blumenthal, thanë për Politico se ka bisedime paraprake për ngritjen e një force paqeruajtëse në Gaza, edhe pse kjo nuk do të përfshinte trupa amerikane. “Ka bisedime në vazhdim për sa i takon ngritjes së mundshme të një force ndërkombëtare”, tha Van Hollen, duke refuzuar të hyjë në detaje. Bisedimet sipas tij janë paraprake dhe në fazë të hershme. “Unë mendoj se do të ishte e rëndësishme një forcë shumëkombëshe në gaza si një lehtësuese e tranzicionit për atë që do të vijë më pas”, tha ai.