Shtetet e Bashkuara të Amerikës kanë dislokuar për të parën herë avionë bombardues me rreze të gjatë veprimi në Norvegji. Katër bombarduesit B1 do të veprojnë nga baza ajrore Oland gjatë javëve të ardhshme. Kjo lëvizje po interpretohet si një mesazh i qartë për Moskën, thotë BBC. Washingtoni po kërkon të tregojë në këtë mënyrë se Amerika është e gatshme t`i mbrojë aleatët e saj në rajonin e pasur me naftë fhe gaz të Arktikut e të kontestuar në rrafshin strategjik. Sipas ligjit ndërkombëtar, Poli i Veriut dhe oqeani që e rrethon nuk janë në pronësi të asnjë vendi. Pak ditë më parë, një bombardues amerikan me aftësi bërthamore e rreze të gjatë veprimi fluturoi mbi kryeqytetet e Lituanisë, Letonisë dhe Estonisë. Fluturimi u bë në shenjë solidariteti me aleatet e NATO-s, mes shqetësimeve të Perëndimit për një shtim të agresivitetit të Rusisë. Lituania, Letonia dhe Estonia që dikur qeveriseshin nga Moska, janë sot anëtare të NATO-s dhe Bashkimit Evropian. Të treja vendet baltike kanë pranuar trupa të NATO-s dhe të SHBA-së në tokën e tyre që nga viti 2014, kur Rusia pushtoi gadishullin e Krimesë të Ukrainës, e cila nuk është anëtare e aleancës.