Ushtria amerikane njoftoi se ka testuar raketën balistike ndërkontinentale "Minuteman 3", testim ky i shtyrë për të shmangur përshkallëzimin e tesioneve me Kinën, gjatë manovrave që Pekini kreu pranë brigjeve të Tajvanit. Testimi i raketës tregon “gadishmërinë e forcave bërthamore amerikane dhe tregon besim në forcën goditëse dhe efektshmërinë e politikës amerikane të frenimit bërthamor”, thuhet në njoftimin e ushtrisë amerikane. Zyrtarët thanë se në të kaluarën janë kryer rreth 300 testime të kësaj natyre dhe e tanishmja nuk lidhet me ndonjë zhvillim të caktuar ndërkombëtar. Në muajin prill ushtria amerikane anuloi një tjetër testim të raketës ndërkontinentale për të ulur tensionet bërthamore, ndërsa Rusia kishte nisur sulmin në Ukrainë. Raketa "Minuteman 3", prodhim i kompanisë Boeing, e aftë të mbajë koka bërthamore, është një nga raketat kryesore dhe më të avancuara të arsenalit bërthamor amerikan. Ajo ka një rreze veprimi prej mbi 9600 kilometrash dhe lëviz me një shpejtësi mbi 24 mijë kilometra në orë.