Presidenti ukrainas Volodymyr Zelensky ka paralajmëruar SHBA-në se Rusia nuk duhet të shpërblehet për pushtimin esaj, ndërsa i dërguari i paqes i Donald Trump përgatitet për bisedime me Vladimir Putinin. Me Shtëpinë e Bardhë që po rrit presionin mbi Kievin për të rënë dakord për një plan paqeje, presidenti ukrainas udhëtoi për në Paris një ditë më parë, në një përpjekje për të mbledhur mbështetje nga aleatët e tij evropianë. Ai u bashkua me Emmanuel Macron dhe kryeministrin britanik Keir Starmer, në një bisedë telefonike të fundit me Steve Ëitkoff, përpara se i dërguari amerikan të nisej për në Moskë për të takuar presidentin rus. Duke folur më vonë në një konferencë për shtyp në kryeqytetin francez, Zelenski tha: "Ne duhet të sigurohemi që vetë Rusia të mos perceptojë asgjë që mund ta konsiderojë si shpërblim për këtë luftë." Komentet e tij erdhën mes një fluksi diplomacie të udhëhequr nga amerikanët për t'i dhënë fund pushtimit pothuajse katërvjeçar të Ukrainës nga Rusia. Zyrtarët ukrainas dhe amerikanë u takuan në Miami gjatë fundjavës dhe të hënën për të finalizuar një plan për t'i dhënë fund luftës, që mund t'i paraqitej Putinit. Të dyja palët punuan për ndryshime në një plan të mëparshëm prej 28 pikash të hartuar nga delegacioni i Shtëpisë së Bardhë, i cili do ta kishte detyruar Ukrainën të dorëzonte rajonet e saj lindore të Donbasit dhe do të kishte zbatuar kufizime të rrepta për forcat e armatosura të Kievit pas çdo armëpushimi. Të hënën, presidenti ukrainas tha: "Çështja e territorit dhe tokës është më e vështira. Ne presim një bisedë me presidentin amerikan mbi çështjet kryesore që janë mjaft sfiduese". Ai shtoi se diskutimet e tyre ishin përqendruar në "negociatat për t'i dhënë fund luftës dhe në garancitë e sigurisë".