Presidenti gjerman Frank-Ëalter Steinmeier tha se shpresonte që Shtetet e Bashkuara të mbanin gjithnjë parasysh se aleatët e tyre ishin të domosdoshëm ndërsa i dha presidentit Joe Biden Urdhrin më të lartë të meritës në Gjermani, të premten, për shërbimin dhe dedikimin ndaj lidhjeve transatlantike. Udhëtimi i Biden-it në Berlin për të diskutuar çështje që variojnë nga lufta në Ukrainë deri tek konflikti në zgjerim në Lindjen e Mesme, vjen ndërsa zgjedhjet në Shtetet e Bashkuara po afrohen. Rizgjedhja e mundshme e ish-presidentit Donald Trump është shkak për shqetësim në shumë shtete evropiane si Gjermania, të cilat panë marrëdhënie të përkeqësuara gjatë presidencës së tij të parë nga viti 2017 deri në 2021. "Vetëm pak vite më parë, distanca ishte rritur aq shumë sa ne pothuajse humbëm njëri-tjetrin," tha Steinmeier në një fjalim në pallatin presidencial pasi Biden u prit me nderime ushtarake. “Kur u zgjodhët president, ju rikthyet shpresën e Evropës në aleancën transatlantike brenda një nate të vetme” – shtoi ai.