Edhe Shtetet e Bashkuara të Amerikës kanë reaguar pas deklaratave të presidentit serb Aleksandar Vuçiç lidhur me mundësinë e ndryshimit të rrjedhës së lumit Ibër, duke e vendosur çështjen në kontekstin më të gjerë të marrëdhënieve mes Kosovës dhe Serbisë. Departamenti Amerikan i Shtetit i tha Radios Evropa e Lirë se paqja dhe stabiliteti në Ballkanin Perëndimor mbeten ndër prioritetet e Shteteve të Bashkuara. “Normalizimi i marrëdhënieve ndërmjet Serbisë dhe Kosovës është pjesë e domosdoshme e këtij procesi”, deklaroi një zëdhënës i Departamentit të Shtetit. Reagimi amerikan vjen pas deklaratave të bëra më nga Vuçiç, i cili tha se autoritetet serbe, së bashku me ekspertë, po shqyrtojnë mundësinë e ndryshimit të rrjedhës së lumit Ibër. Presidenti serb e lidhi këtë ide me situatën e shtëpive dhe vilave të serbëve pranë Liqenit të Ujmanit, duke pretenduar se ato po rrezikojnë të prishen. Vuçiç tha se një ndryshim i mundshëm i rrjedhës së lumit do të mund të ndikonte në furnizimin me ujë të Liqenit të Ujmanit, i njohur edhe si Liqeni i Gazivodës, një prej burimeve më të rëndësishme ujore dhe energjetike në veri të Kosovës.