Ambasadorja amerikane në Kombet e Bashkuara u ka bërë thirrje Rusisë dhe Kinës që të ndryshojnë kursin, të ndalojnë së shpërblyeri sjelljen e keqe të Koresë së Veriut dhe të mos e mbrojnë atë nga shmangia e sanksioneve për shkak të aktiviteteve të programit të armëve. Ambasadorja Linda Thomas-Greenfield i bëri këto deklarata gjatë vizitës në Zonën e Demilitarizuar, një zonë e fortifikuar kufitare mes dy Koreve, që teknikisht janë në luftë. Vizita e saj në Korenë e Jugut vjen pasi Rusia refuzoi të rinovojë mandatin e panelit shumëkombësh të ekspertëve, i cili gjatë 15 vjetëve të fundit ka monitoruar zbatimin e sanksioneve të OKB-së që synojnë të frenojnë programin bërthamor dhe raketor të Koresë së Veriut. Vetoja e Moskës dhe abstenimi i Kinës vetëm “fuqizon” përpjekjet e Koresë së Veriut për të shmangur sanksionet ndërkombëtare dhe “e mbrojnë” atë nga llogaridhënia, tha Thomas-Greenfield. “Fshehja e të vërtetës nuk e ndryshon këtë. Shpërblimi i sjelljes së keqes vetëm e inkurajon atë”, tha ajo për gazetarët. “Ne u bëjmë thirrje Rusisë dhe Kinës që të ndryshojë kursin dhe të nxisin Penianin që të zgjedhë diplomacinë, të kthehet në tavolinën e bisedimeve dhe të angazhohet në një dialog konstruktiv”.