Ambasada e Shteteve të Bashkuara të Amerikës në Kiev tha se ekzistonte një rrezik i shtuar për sulme me raketa dhe dronë nga rusia, në të gjithë Ukrainën, në ditët në vijim, ndërsa vendi përgatitet të shënojë 33 vjetorin e pavarësisë nga Bashkimi Sovjetik të shtunën. Komandanti i lartë i Ukrainës, Oleksandr Syrskyi, tha në fillim të kësaj jave se Rusia kishte lëshuar 9,600 raketa dhe 14,000 dronë gjatë sulmeve në Ukrainë që kur ajo filloi pushtimin e saj në shkallë të plotë në shkurt 2022. “Ambasada e SHBA-së në Kiev vlerëson se gjatë disa ditëve të ardhshme dhe gjatë fundjavës ka një rrezik të shtuar për sulme me dronë dhe raketa ruse në të gjithë Ukrainën, në kuadër të Ditës së Pavarësisë së Ukrainës që shënohet më 24 gusht”, thuhet në deklaratë. Deklarata u postua në faqen e internetit të ambasadës të mërkurën vonë. Për ukrainasit, Dita e Pavarësisë ka marrë një rëndësi më të madhe që nga pushtimi i Rusisë, i cili ka ngjallur ndjenja patriotike te shumë njerëz. Këtë vit, festa vjen më shumë se dy javë pasi Ukraina nisi një inkursion të befasishëm ndërkufitar në rajonin e Kurskut të Rusisë, edhe pse trupat ruse po avancojnë vazhdimisht në lindje të Ukrainës. Presidenti rus Vladimir Putin ka thënë se Moska do të japë një "përgjigje të denjë" ndaj inkursionit, të cilin ai e ka përshkruar si një provokim të madh.