Presidenti Donald Trump njoftoi se Shtetet e Bashkuara kanë arritur një marrëveshje për naftën me Venezuelën. Sipas tij, kjo dakordësi do të dyfishojë rezervat amerikane të naftës, do të rrisë furnizimin me naftë dhe do të ulë çmimet. “Me udhëzimin tim, Sekretari i Shtetit Marco Rubio dhe Sekretari Pete Hegseth, duke punuar ngushtë me Presidenten e Përkohshme Shumë të Respektuar të Venezuelës, Delcy Rodriguez, dhe, nëpërmjet një partneriteti me biznesin privat, kanë siguruar kontrollin e SHBA-së mbi më shumë se 65 miliardë fuçi rezervash nafte në Venezuelë, pa asnjë kosto për taksapaguesit amerikanë”, shkroi Trump në rrjetet sociale . Lufta e Iranit ka ndërprerë një të pestën e furnizimit botëror me naftë për gjashtë muaj. Rezervat e emergjencës së SHBA-së nuk kanë qenë kaq të ulëta që nga fillimi i viteve 1980, me investitorët e tregut të obligacioneve dhe votuesit që po humbasin durimin me çmimet e larta. “Ky transaksion historik i dyfishon më shumë rezervat amerikane të naftës, rrit shumë furnizimin tonë me naftë dhe ul ndjeshëm çmimet e gazit për të gjithë amerikanët” - shkroi Trump në postimin e tij. Rodríguez gjithashtu vlerësoi marrëveshjen midis dy vendeve. “Qëllimi ynë është të ecim drejt konsolidimit të pozicionit tonë si një fuqi prodhuese e energjisë, duke i vënë rezervat tona të mëdha në shërbim të zhvillimit kombëtar, krijimit të vendeve të punës, rritjes së të ardhurave për punëtorët tanë dhe mirëqenies së popullit tonë”, tha ajo në një deklaratë të premten në mbrëmje. Një zyrtar i Shtëpisë së Bardhë i tha CNN-së se marrëveshja e negociuar do i japë Shteteve të Bashkuara 55% të prodhimit të një sipërmarrjeje të re private të përbashkët që do të jetë kompania e dytë më e madhe private e naftës në botë për nga rezervat. Me mbështetjen e SHBA-së, tha zyrtari, Rodríguez i dha një kompanie private koncesione 100-vjeçare për fushat e naftës. Zyrtari shtoi se kompania private është një projekt i përbashkët i qeverisë amerikane dhe një operatori privat në Venezuelë.