Sulmet ajrore izraelite vranë të paktën 46 persona në Rripin e Gazës në 24 orët e fundit, përfshirë 11 në një kafene të improvizuar në një pjesë që është shpallur zonë humanitare nga Izraeli, thanë mjekët. Ndërsa në Liban, avionë luftarakë goditën periferitë jugore të Bejrutit dhe vranë 33 persona në pjesë të tjera të vendit. Bombardimet e fundit erdhën pasi SHBA tha se nuk do të reduktonin mbështetjen e tyre ushtarake për Izraelin pas skadimit të një afati për lejimin e më shumë ndihmave humanitare në Gazë. Departamenti i Shtetit përmendi disa përparime, edhe pse grupet ndërkombëtare të ndihmave thanë se Izraeli nuk kishte arritur të përmbushte kërkesat e Shteteve të Bashkuara. Në Liban, shpërthime të mëdha tronditën periferitë jugore të Bejrutit, në Dahiyeh, ku organizata Hezbollah ka një prani të konsiderueshme, menjëherë pasi ushtria izraelite lëshoi paralajmërime evakuimi për shtëpitë në zonë. Nuk pati të dhëna të menjëhershme për viktima. Ushtria izraelite tha se kishte në objektiv infrastrukturën e Hezbollahut, përfshirë qendrat e komandës dhe vendet e prodhimit të armëve, por nuk ofroi prova për këtë. Një tjetër sulm izraelit në një ndërtesë në lindje të Bejrutit vrau të paktën gjashtë persona, mes të cilëve tre fëmijë. Një sulm tjetër ajror i Izraelit mbi një ndërtesë në Libanin qendror vrau 15 persona, përfshirë tetë gra dhe katër fëmijë dhe plagosi të paktën 12 të tjerë, tha Ministria e Shëndetësisë e Libanit. Sulmet u kryen pa paralajmërim dhe media shtetërore tha se ndërtesa strehonte familjet e zhvendosura. Izraeli ka intensifikuar goditjet ajrore ndaj Libanit që nga fundi i shtatorit, duke u zotuar se do ta dëmtojë rëndë Hezbollahun dhe do t'i japë fund sulmeve ndërkufitare që vazhdojnë prej një viti nga grupi militant libanez. Në anën tjetër, një raketë shpërtheu mbi një magazinë në qytetin verior izraelit Nahariya të martën, duke vrarë dy persona. Dy të tjerë u plagosën nga një shpërthim tjetër jashtë qytetit. Një dron i Hezbollahut u rrëzua mbi një çerdhe pranë qytetit verior izraelit të Haifës të martën në mëngjes, por fëmijët ishin brenda një strehimi të nëndheshëm dhe nuk pati të lënduar.