Presidenti i Iranit Masoud Pezeshkian vuri të hënën në pikëpyetje sinqeritetin e Shteteve të Bashkuara në kërkimin e negociatave me Teheranin ndërsa turma njerëzish, që brohorisnin "Vdekje Amerikës", u mblodhën në të gjithë vendin për të shënuar përvjetorin e Revolucionit Islamik të vitit 1979. Presidenti amerikan Donald Trump javën e kaluar riktheu fushatën e tij të "presionit maksimal" ndaj Iranit, që përfshin përpjekjet për të ulur eksportet e tij të naftës në zero, në mënyrë që të ndalojë Teheranin të sigurojë një armë bërthamore. Trump tha megjithatë se do të dëshironte të kishte një marrëveshje paqeje bërthamore me Teheranin dhe shprehu gatishmërinë për të biseduar me Pezeshkian, i cili tha javën e kaluar se do të ishte e lehtë të verifikohej se Irani nuk po zhvillon armë atomike.