Kancelari gjerman Friedrich Merz ka konfirmuar se raketat e tipit "Tomahaëk”, të premtuara nga presidenti i mëparshëm amerikan Joe Biden në vitin 2024, të paktën për momentin nuk do të stacionohen në Gjermani. "Amerikanët aktualisht SHBA nuk ka raketa të tilla të mjaftueshme për vete”, tha Merz në një televizion gjerman të dielën. "Objektivisht, nga SHBA-të pothuajse nuk ka mundësi të dorëzohen sisteme armësh të këtij lloji.” Njëkohësisht ai theksoi në intervistë se "procesi nuk ka përfunduar.” Raketat me rreze të mesme veprimi "Tomahaëk”, të cilat mund të arrijnë Rusinë, duhej të forconin aftësinë parandaluese të Gjermanisë, derisa Evropa të zhvillojë vetë raketa të tilla. Në lidhje me pjesëmarrjen bërthamore të SHBA-së në Gjermani, Merz theksoi se "nuk ka absolutisht asnjë ndryshim”. "Nuk ka asnjë kufizim të angazhimit amerikan për parandalimin bërthamor në territorin e NATO-s. Për këtë nuk ka asnjë dyshim, në asnjë moment,” tha ai. Kancelari Merz nuk e quajti "të ri” vendimin për tërheqjen e më shumë se 5.000 ushtarëve amerikanë nga Gjermania, të shpallur të premten nga presidenti amerikan Donald Trump. Sipas tij, bëhet fjalë për një kontingjent që paraardhësi i Trumpit, Biden, e kishte stacionuar përkohësisht dhe për tërheqjen e të cilit prej kohësh ishte diskutuar. "Ndoshta është pak e ekzagjeruar, por nuk është diçka e re,” tha Merz. Kancelari gjerman mohoi një lidhje të drejtpërdrejtë mes njoftimeve të Trumpit dhe deklaratave të tij kritike për luftën në Iran: "Nuk ka asnjë lidhje.” Ai njëkohësisht ritheksoi kritikat e tij ndaj strategjisë amerikane për Iranin dhe mbrojti deklaratën sipas së cilës Irani i ka "poshtëruar” SHBA‑të.