Negociatat mes Shteteve të Bashkuara dhe Iranit po hasin në problematika, duke shtuar rrezikun e një përshkallëzimi të krizës bërthamore në mungesë të një zgjidhjeje diplomatike. Për shkak të “rreziqeve të shtuara për sigurinë”, Departamenti Amerikan i Shtetit ka autorizuar evakuimin e stafit jo thelbësor të ambasadës në Bagdad dhe ka lejuar largimin vullnetar të familjeve të ushtarëve amerikanë në disa baza në rajon, përfshirë Kuvajtin dhe Bahreinin. Zëdhënësja e Shtëpisë së Bardhë, Anna Kelly, konfirmoi vendimin pas një “rishikimi të fundit”, pa dhënë hollësi të mëtejshme. Gjatë një deklarate në Qendrën Kennedy, Presidenti amerikan Donald Trump u shpreh para gazetarëve se qytetarëve amerikanë u ishte rekomanduar të largoheshin nga rajoni, pasi situata mund të paraqiste rreziqe. "Mund të jetë një zonë e rrezikshme, dhe do të shohim se çfarë do të ndodhë," tha ai.