Presidenti i Serbisë, Aleksandër Vuçiç, njoftoi këtë të premte se Shtetet e Bashkuara të vendosin sanksione ndaj Serbisë. Masat ndëshkuese do të vendosen brenda pak ditësh ndaj Industrisë së Naftës së Serbisë (NIS). Kjo për shkak të pronësisë ruse. "Sanksione do të vendosin edhe britanikët, por kjo do të thotë të gjithë. Ky është ndoshta një nga lajmet më të vështira", tha Vuçiç teksa ishte I ftuar në televizionin Informer. Në krye të NIS-it është kompania ruse Gazprom Neft që zotëron 50 për qind të aksioneve, pastaj shteti i Serbisë me 29.87 për qind të aksioneve. Vuçiç tha se këto janë "mbase sanksionet më të rënda". "Duhet të presim aktin përfundimtar. Kemi bisedime me Rusinë. Të shohim nëse (pronësia) mund të ulet nën 50 për qind, në mënyrë që të blejmë një pjesë", tha presidenti serb. Serbia është i vetmi shtet në Ballkanin Perëndimor që nuk u është bashkuar sanksioneve të Perëndimit për ta dënuar Rusinë për luftën e nisur në Ukrainë, dhe vazhdon të kultivojë lidhje me zyrtarët në Moskë.