Shtetet e bashkuara të amerikës do të bëjnë shumë shpejt publik vendimin për të dërguar bomba thërrmuese në Ukrainë. Lajmi është dhënë nga Nju Jork Times e cila i referohet një zyrtari të lartë të administratës amerikane. Kievi prej kohësh po bën presion për të marrë këto armë të polemizuara dhe të ndaluara nga shumë vende të botës, por deri më tani, Uashingtoni ka bërë rezistencë për shkak të potencialit të tyre për dëme pa diskriminim mes civilëve. Javën e kaluar, shefi i shtabit amerikan, gjenerali Mark Milley, kishte pranuar sidoqoftë se SHBA po e vlerësonte mundësinë e dërgimit të këtyre municioneve në Kiev. Ukraina është aktualisht në muajin e dytë të kundërofensivës së paralajmëruar të saj kundër forcave ruse. Por progresi, vecanërisht në provincat jugore të Zaporizhias dhe Donetskut ka qenë i ngadaltë. Me qëllim përshpejtimin e avancimit, ndoshta SHBA mund të ndryshojë mendje për bombat thërrmuese që mund ta ndihmonin kievin për shkatërrimin e pozicioneve ruse përgjatë vijës lindore të frontit.