Një hetim nga FBI, ka zbuluar përpjekjet e qeverisë kineze për të depërtuar në rrjetet amerikane të telekomunikacionit. Sipas hetimeve, spiunazhi kibernetik synon vjedhjen e informacionit nga shtetas amerikanë, që punojnë për qeverinë apo që janë në politikë. Hetuesit nuk identifikuan asnjë prej individëve që ishin në shënjestër të hakerave kinezë. Në shtator, FBI-ja njoftoi se kishte bllokuar një operacion të madh hakerimi kinez të njohur si ‘Flax Typhoon’, që kishte të bënte me instalimin e një programi kompiuterik, në më shumë se 200,000 pajisje kompiuterike, përfshirë kamera dhe videoregjistrues. Pajisjet ishin përdorur më pas për të krijuar një rrjet masiv kompjuterësh, që mund të përdoreshin për të kryer vepra të tjera penale kibernetike. Në muajin tetor, zyrtarët njoftuan se hakerat e lidhur me Kinën kishin vënë në shënjestër edhe telefonin e Trump, në atë kohë kandidat për president, krahas telefonave të njerëzve të lidhur me kandidaten demokrate, nënpresidenten Kamala Harris. Sakaq, Kina ka hedhur poshtë akuzat e zyrtarëve amerikanë për përfshirje në spiunazh kibernetik.