Të paktën pesë persona kanë humbur jetën për shkak të stuhisë së dimrit që ka vendosur një pjesë të Shteteve të Bashkuara nën pushtetin e akullit, duke çuar në mbyllje masive të shkollave, kaos në udhëtime dhe ndërprerje të energjisë elektrike. Shtatë shtete amerikane shpallën emergjenca: Maryland, Virginia, Ëest Virginia, Kansas, Missouri, Kentucky dhe Arkansas. Më shumë se 2,300 fluturime janë anuluar, afro 9,000 vonesa janë raportuar gjithashtu për shkak të motit ekstrem të shkaktuar nga vorbulla polare e ajrit të ftohtë që zakonisht rrethon Polin e Veriut. Rreth 190,000 njerëz nuk kishin energji herët të martën në të gjitha shtetet që ndodhen në rrugën e stuhisë. Sipas Shërbimit Kombëtar të Motit, bora dhe reshjet parashikohen të vazhdojnë gjatë ditës në pjesën më të madhe të zonës verilindore të SHBA-së. Ndërsa reshjet më pas do të ndalen, ajri i ftohtë i Arktikut pritet të mbajë acarin dhe akujt në një pjesë të vendit për disa javë të tjera.