Gjykata e Lartë lejoi të hyjë në fuqi ligji i administratës Biden, që detyron pronarin kinez të TikTok ta shesë biznesin e tij në Shtetet e Bashkuara të Amerikës deri ditën e dielë, ose do të përballet me bllokimin e këtij aplikacioni përtej oqeanit. Opinioni i gjykatës ishte se rreziku për sigurinë kombëtare që vjen nga lidhjet e këtij aplikacioni me Kinën tejkalon shqetësimet për kufizimin e lirisë së fjalës, që ishin argumentet e kompanisë TikTok. “Nuk ka dyshim se, për më shumë se 170 milionë amerikanë, TikTok ofron një mundësi të veçantë për t’u shprehur, është mjet për të komunikuar me komunitetin. Por Kongresi ka përcaktuar se bllokimi është i nevojshëm për të adresuar shqetësimet e sigurisë kombëtare të mbështetura mirë në lidhje me praktikat e mbledhjes së të dhënave të TikTok.” – vlerësoi gjykata.