Kryetari i Dhomës së Përfaqësuesve Kevin McCarthy tha se pati një diskutim produktiv për tavanin e borxhit me Presidentin Biden të hënën vonë në Shtëpinë e Bardhë, por ende nuk ka marrëveshje. Uashingtoni po përpiqet të arrijë një kompromis buxhetor për rritjen e kufirit të huamarrjes në kohë për të shmangur një krizë të shkaktuar nga pamundësia e qeverisë amerikane për të shlyer detyrimet e saj financiare. Ky është një moment vendimtar për presidentin demokrat dhe Kryetarin repiblikan të Dhomës së Përfaqësuesve, vetëm 10 ditë përpara skadimit të afatit për të rritur tavanin e borxhit. Më 1 qershor, Shtetet e Bashkuara mund të mos kenë para të mjaftueshme për të shlyer borxhet dhe detyrimet e tjera financiare, një situatë e frikshme. Sekretarja e Thesarit Janet Yellen tha në një letër drejtuar Kongresit të hënën se "ka shumë gjasa" që Departamenti i Thesari mund të mos jetë në gjendje të paguajë të gjitha faturat e vendit. “Ne të dy folëm për nevojën për një marrëveshje dypartiake”, tha Presidenti Biden në fillim të takimit.