Zëvendësministri i Jashtëm rus Sergei Ryabkov tha të hënën se Shtetet e Bashkuara të amerikës mund të përballen me "pasoja fatale" nëse injorojnë paralajmërimet e Moskës për të mos e lejuar Ukrainën të përdorë armët e ofruara nga Uashingtoni për të goditur objektivat brenda Rusisë. Ryabkov komentoi vendimin e Presidentit Joe Biden, javën e kaluar, për të miratuar përdorimin e armëve të furnizuara nga SHBA për të goditur shënjestra brenda Rusisë që janë përfshirë në sulmet në rajonin e Harkivit, në Ukrainë. "Dëshiroj të paralajmëroj liderët amerikanë kundër llogaritjeve të gabuara që mund të kenë pasoja fatale. Për arsye të panjohura, ata nënvlerësojnë seriozitetin e situatës dhe pasojat që mund të ketë ky veprim", tha Riabkov për agjencinë shtetërore të lajmeve RIA. Ai iu referua komenteve të bëra javën e kaluar nga Presidenti Vladimir Putin, i cili tha se vendet e NATO-s po luanin me zjarrin dhe po rrezikonin një konflikt më të thellë global, një prej një serie paralajmërimesh nga Moska për rrezikun e një përshkallëzimi serioz. “I bëj thirrje këtyre figurave në SHBA... që të kalojnë një pjesë të kohës së tyre, që me sa duket e shpenzojnë në videolojëra, që të studiojnë atë që u tha në detaje nga Putini”. tha Ryabkov. Putini ka dhënë "një paralajmërim shumë domethënës dhe ai duhet të merret me seriozitetin më të madh", shtoi ai. Putin tha se Perëndimi do të përfshihej drejtpërdrejt në luftë nëse ukraina godet thellë në rusi me armët e tij, sepse sulme të tilla do të kërkonin ndihmë satelitore, të inteligjencës dhe ushtarake. Sekretari i Përgjithshëm i NATO-s, Jens Stoltenberg tha javën e kaluar se NATO kishte të drejtë të ndihmonte Ukrainën për tu vetëmbrojtur dhe kjo nuk e bën NATO-n palë në konflikt. Presidenti ukrainas Volodymyr Zelenskiy tha në fundjavë se Kievi ishte mirënjohës ndaj Uashingtonit që e lejoi të përdorte sistemet raketore HIMARS të furnizuara nga SHBA në rajonin e Harkivit, por kjo nuk ishte e mjaftueshme. Ukraina ka argumentuar prej kohësh se kufizimet në mënyrën se si mund të përdorë armët e furnizuara nga Perëndimi po e pengojnë seriozisht atë të mbrojë veten.