SHBA ka "kontakte të drejtpërdrejta" me rebelët e HTS që tani kontrollojnë Sirinë pas rrëzimit të regjimit të Asadit, tha Sekretari i Shtetit Antony Blinken. Është kjo njohja e parë e ndërveprimit të drejtpërdrejtë të SHBA-së me Hayat Tahrir al-Sham, që Uashingtoni ende e cilëson si një organizatë terroriste. Blinken u tha gazetarëve se SHBA ka qenë në kontakt me rebelët veçanërisht për fatin e gazetarit të zhdukur amerikan, Austin Tice. Blinken foli në Jordani pas bisedimeve me përfaqësues nga disa vende arabe, Turqia dhe Evropa për të diskutuar për të ardhmen e Sirisë. Zyrtarët ranë dakord të mbështesin një proces tranzicioni paqësor në vend, me ministrin e jashtëm të Jordanisë që tha se fuqitë rajonale nuk donin ta shihnin Sirinë "të binte në kaos". Një komunikatë e përbashkët bëri thirrje për një qeveri siriane gjithëpërfshirëse që respekton të drejtat e pakicave dhe nuk ofron një bazë për "grupet terroriste". Bisedimet brenda dhe jashtë Sirisë pas trazirave të javëve të fundit, kanë qenë të një rëndësie jetike për ngritjen e një qeverisjeje të re që përfaqëson të gjithë sirianët. HTS nuk ishte i pranishëm në takimin në Jordani. Ministri i Jashtëm irakian Fuad Hussein shprehu shqetësimin për të ardhmen e Sirisë dhe për të ardhmen e përbashkët të Lindjes së Mesme dhe më gjerë. Ai tha se lojtarët rajonalë nuk donin të shihnin një Libi tjetër, duke iu referuar kaosit që pasoi largimin e kolonelit Gadafit nga pushteti. Ministri i Jashtëm turk Hakan Fidan tha ndërkohë se institucionet ekzistuese siriane duhet të ruhen dhe të reformohen. Në bisedimet në Jordani mungonte ndonjë përfaqësues nga Siria. Munguan gjithashtu edhe dy vendet që i dhanë mbështetje Assadit, Irani dhe Rusia.