Shtetet e Bashkuara të Amerikës i kanë vendosur Serbisë kusht që industria e naftës të mos ketë lidhje me Rusinë. Ndihmëssekretari amerikan i Shtetit për Evropën dhe Euroazinë, James O’Brien, tha se SHBA-ja nuk dëshiron që Moska ta udhëheqë NIS-in. “E vetmja mënyrë që rreziku të jetë zero, është që pjesa e pronësisë ruse të jetë zero. Ky është qëndrimi me të cilin hyjmë në këtë bisedë. Ne tashmë e kemi bërë këtë gjë me kompani të tjera ruse në vende të tjera si, Holandë, Zvicër dhe Turqi”, tha O'Brien për Radiotelevizionin e Serbisë (RTS). SHBA ka vendosur sanksione ndaj industrisë së naftës serbe pasi është nën pronësi të kompanisë ruse Gazprom Nefta. Richard Verma, zëvendëssekretari amerikan i Shtetit për Menaxhim dhe Burime, tha në Beograd të shtunën se Serbia nuk do të përballet me pasoja ekonomike, nëse pronësia ruse hiqet nga NIS-i. Serbia pret që bisedimet me Rusinë ta zgjidhin këtë çështje, pasi Uashingtoni dhe Beogradi ngritën çështjen e pronësisë ruse në NIS.Kompania shtetërore ruse, Gazprom Neft, sipsa Radio Evropa e Lirë, ka shumicën e aksioneve në NIS që nga viti 2008, ndërsa nga viti 2022, aksione ka edhe kompania e saj mëmë, Gazprom.