Koreja e Jugut dhe Shtetet e Bashkuara do të zhvillojnë bisedime në Seul për koordinimin më të mirë të një përgjigjeje bërthamore në rast të një lufte me Korenë e Veriut, mes ankthit për arsenalin në rritje të Phenianit, thanë zyrtarët e Seulit. Takimi i tretë i Grupit Konsultativ Bërthamor në thelb është një vijimësi e samitit të vitit të kaluar, gjatë të cilit Shtetet e Bashkuara premtuan t'i japin Koresë së Jugut më shumë njohuri në planifikimin e saj bërthamor për një konflikt të mundshëm me Veriun. Bisedimet erdhën ndërsa Koreja e Veriut po ecën përpara me synimin për të avancuar armët e saj bërthamore dhe sistemet e tyre të shpërndarjes, gjë që shkaktoi shqetësim në Korenë e Jugut për gatishmërinë e saj bërthamore. Disa politikanë, duke përfshirë edhe anëtarë të lartë të partisë së Presidentit Yoon Suk Yeol, kërkuan që Seuli, që aktualisht është nën ombrellën bërthamore amerikane, të zhvillojë armët e veta bërthamore, një hap që Uashingtoni e kundërshton. Në fund të majit, përpjekja e Koresë së Veriut për të nisur një satelit zbulues ushtarak dështoi pasi një motor rakete i zhvilluar rishtazi shpërtheu gjatë fluturimit. Seuli dhe Uashingtoni e dënuan përpjekjen duke e quajtur shkelje të sanksioneve të Këshillit të Sigurimit të OKB-së që ndalojnë përdorimin e teknologjisë balistike nga Pheniani. Më herët në dhjetor, shba dhe koreja e jugut paralajmëruan se çdo sulm bërthamor nga Koreja e Veriut kundër Shteteve të Bashkuara ose aleatëve të saj do të përballet me një "përgjigje të shpejtë, dërrmuese dhe vendimtare" dhe do të rezultojë në fundin e regjimit të Kim Jong Un.