Lufta në Iran dhe në Lindjen e Mesme më gjerë duket se ka hyrë në një fazë pritjeje, ndërsa Uashingtoni mbetet me veshët hapur për përgjigjen e Iranit ndaj propozimit të tij më të fundit për paqe. Ndërkohë Teherani, i cili ende nuk ka dhënë një përgjigje zyrtare, vazhdoi të mbajë qëndrimin e tij armiqësor ndaj SHBA-së. Korpusi i Gardës Revolucionare Islamike të Iranit, i linjës së ashpër, reagoi me zemërim ndaj vazhdimit të bllokadës detare amerikane ndaj porteve iraniane, duke kërcënuar se “çdo sulm ndaj cisternave iraniane dhe anijeve tregtare do të rezultojë me një sulm të rëndë ndaj një prej qendrave amerikane në rajon dhe anijeve armike”. Kjo vjen një ditë pasi sulmet amerikane ndaluan dy cisterna me flamur iranian në Gjirin e Omanit, për të cilat Uashingtoni tha se po përpiqeshin të shkelin bllokadën ndaj porteve iraniane. Komanda Qendrore amerikane, CENTCOM, tha se bllokada e saj detare “vazhdon të zbatohet plotësisht” dhe se që nga 13 prilli ka kthyer mbrapsht 58 anije tregtare dhe ka ndaluar katër të tjera që kishin si destinacion portet iraniane. Sulmet ajrore amerikano-izraelite të nisura më 28 shkurt kanë zhdukur një pjesë të madhe të udhëheqjes iraniane, duke bërë që presidenti amerikan, Donald Trump, ta quajë regjimin “të çrregulluar” dhe pa një udhëheqës të qartë. Disa vëzhgues kanë thënë se Garda Revolucionare Islamike ka forcuar pushtetin e saj dhe i është kundërvënë udhëheqësve më të moderuar, të cilët kanë kërkuar arritjen e një marrëveshjeje me negociatorët amerikanë. Të premten, si Trump ashtu edhe sekretari amerikan i Shtetit, Marco Rubio, thanë se prisnin një përgjigje ndaj ofertës më të fundit amerikane, që thuhet se është një memorandum njëfaqësh që do t’i jepte fund luftimeve dhe do të hapte Ngushticën jetike të Hormuzit, por do të linte për diskutime të mëvonshme disa çështje kyç, përfshirë të drejtën e Iranit për pasurimin e uraniumit. Por, deri mëngjesin e të dielës nuk kishte asnjë shenjë se Teherani ua kishte dërguar ndërmjetësve pakistanezë përgjigjen e tij dhe as nuk kishte bërë ndonjë koment tjetër publik.