Pakistani po zhvillon të tjera përpjekje për të ulur në tryezën e negociatave sërish Shtetet e Bashkuara të Amerikës dhe Iranin ndërsa tensionet janë përshkallëzuar akoma dhe më shumë mes dy vendeve. Islamabadi është përpjekur të ndërmjetësojë mes Uashingtonit dhe Teheranit që nga shpërthimi i konfliktit, një rol që ka marrë mbështetje publike edhe nga Kina. “Nuk kam informacion të saktë për atë që po ndodh tani, por mund të them se angazhimi nuk është ndërprerë as gjatë armiqësive aktive”, tha një zyrtar i lartë në Islamabad për Radion Evropa e Lirë. “Janë vendet e Gjirit Persik ato që janë më të shqetësuara, pasi ato po përballen me barrën kryesore të sulmeve iraniane... madje më shumë se Izraeli, tani që Izraeli nuk është pjesëmarrës aktiv në luftë”, shtoi ai ndërsa u pyet në Pakistani i trembet shpërthimit të një lufta pranë kufijve të tij. Më 24 korrik, Reuters raportoi se Pakistani po përpiqej të gjente një rrugë për rifillimin e bisedimeve të ndërprera mes Teheranit dhe Uashingtonit. Sipas raportimit, kjo përpjekje po mbështetet dhe inkurajohet nga Pekini, aleat i ngushtë i Pakistanit. Duke cituar tre burime pakistaneze, Reuters tha se rifillimi i bisedimeve u diskutua gjatë vizitës në Islamabad javën e kaluar të ministrit të Brendshëm iranian, Eskandar Momeni. Momeni, i cili konsiderohet i afërt me Korpusin e Gardës Revolucionare Islamike (IRGC), u takua me kryeministrin pakistanez, Shehbaz Sharif ,dhe me shefin e ushtrisë pakistaneze, Asim Munir, gjatë qëndrimit të tij dyditor në kryeqytetin pakistanez më 20-21 korrik. Teherani po ashtu duket se ka sinjalizuar gatishmërinë për një armëpushim dhe rifillimin e bisedimeve me SHBA.