Ftesa e Presidentit rus Vladimir Putin në një takim të G20-ës në Miami të Floridës, në muajin dhjetor, mund ta inkurajojë Moskën të vazhdojë agresionin e saj ndaj Ukrainës, deklaroi të enjten kryeministri polak Donald Tusk. Sekretari amerikan i Shtetit, Marco Rubio, tha të mërkurën se shpresonte që Putini ta pranonte ftesën dhe se kjo do t'i jepte atij mundësinë të angazhohej me Presidentin Donald Trump dhe liderë të tjerë botërorë. "Nëse ftesa e Putinit në G20 do të mund të na afronte drejt një paqeje të drejtë, unë do të isha absolutisht pro saj," tha Tusk në një konferencë për shtyp. "Megjithatë në këtë fazë, Rusia mund ta shohë këtë si një inkurajim për të vazhduar politikat e saj agresive. Kjo është ajo që unë druaj", tha ai. Trump e ka ftuar Putinin të marrë pjesë në samitin e liderëve botërorë që do të mbahet në Miami dhe kjo u konfirmua nga sekretari amerikan i shtetit, Marko Rubio, pas takimit me kryediplomatin rus, Sergei Lavrov. Kjo lëvizje vjen ndërsa Uashingtoni përpiqet të arrijë një marrëveshje për t'i dhënë fund luftës në Ukrainë, me Trumpin që këmbëngul se po punon me të dyja palët.