Pas botimit të një dokument mbi sigurinë kombëtare nga administrata amerikane kryediplomatja e BE-së, Kaja Kallas, tha se SHBA është ende "aleatja më e madhe e Evropës" pavarësisht dallimeve që ekzistojnë për çështje të shumta. Kallas, u përpoq të minimizonte tensionet me SHBA-në, pasi administrata Trump publikoi dokumentin ku kritikonte ashpër aleatët evropianë. Komentet e Kallas vijnë ndërsa shumë udhëheqës evropianë kanë frikë se qeveria amerikane po i kthen shpinën Evropës, veçanërisht lidhur me mbështetjen për Ukrainën, e cila po mbrohet nga pushtimi i Rusisë. "Ka shumë kritika në atë dokument, por mendoj se disa prej tyre janë gjithashtu të vërteta; nëse shikoni Evropën, ajo e ka nënvlerësuar fuqinë e saj ndaj Rusisë", tha Kallas. "Duhet të kemi më shumë vetbesim", tha ajo, duke shtuar se "SHBA-të janë ende aleati ynë më i madh". "Mendoj se nuk kemi qenë gjithmonë dakord për tema të ndryshme, por mendoj se parimi i përgjithshëm vazhdon të ekzistojë. Ne jemi aleatët më të mëdhenj dhe duhet të qëndrojmë të bashkuar", tha ajo. Dokumenti i Strategjisë së Sigurisë Kombëtare të SHBA-së, i cili u postua në faqen e internetit të Shtëpisë së Bardhë të premten, pasqyron kritikat ndaj Evropës që ishin paraqitur tashmë në muajin shkurt edhe në një fjalim të ashpër të Zëvendëspresidentit JD Vance në Konferencën e Sigurisë në Mynih .