Sekretari i Shtetit i SHBA-së, Marco Rubio, i ka bërë thirrje Kinës që të parandalojë Iranin nga mbyllja e Ngushticës së Hormuzit, një nga rrugët më të rëndësishme detare në botë. Thirrjet e tij erdhën pasi televizioni shtetëror iranian Press TV raportoi se parlamenti kishte miratuar një plan për të mbyllur Ngushticën, ndërsa sqaroi se tashmë vendimi përfundimtar i takon Këshillit Suprem të Sigurisë Kombëtare që do të vendosë nëse do e aprovojë mbylljen e ngushticës apo jo. Çdo ndërprerje e furnizimit me naftë do të kishte pasoja të thella për ekonominë. Kina në veçanti është blerësi më i madh në botë i naftës iraniane dhe ka një marrëdhënie të ngushtë me Teheranin. Pas sulmeve të SHBA kundrejt centraleve bërthamore iraniane, çmimet e naftës u rritën duke arritur nivelet më të larta në pesë muaj. "Unë e inkurajoj qeverinë kineze në Pekin që t'i telefonojë [Iranit] për këtë, sepse ata varen shumë nga Ngushtica e Hormuzit për naftën e tyre", tha Rubio në një intervistë me Fox Neës të dielën. "Nëse ata [e mbyllin Ngushticën]... kjo do të jetë vetëvrasje ekonomike për ta. Dhe ne ruajmë mundësitë për t'u marrë me këtë, por edhe vendet e tjera duhet ta shqyrtojnë këtë. Do të dëmtonte ekonomitë e vendeve të tjera shumë më keq sesa tonën.", nënvizoi ai. Rreth 20% e naftës botërore kalon nëpër Ngushticën e Hormuzit, me prodhuesit kryesorë të naftës dhe gazit në Lindjen e Mesme që përdorin rrugën ujore për të transportuar energji nga rajoni. Çdo përpjekje për të ndërprerë operacionet në Ngushticë mund të rrisë ndjeshëm çmimet globale të naftës. Kostoja e naftës së papërpunuar ndikon në gjithçka, nga çmimi në pikat e karburantit e deri tek kostoja e ushqimit në supermarket. Kina në veçanti blen më shumë naftë nga Irani sesa çdo vend tjetër - me importet e saj nga Irani që tejkaluan 1.8 milion fuçi në ditë muajin e kaluar, sipas të dhënave nga firma e ndjekjes së anijeve Vortexa.