Këto janë momentet kur marinasat amerikanë në bashkëpunim me departamentin e sigurisë kombëtare ndërhyjnë në një anije cisterne me naftë dhe e sekuestrojnë për shkak se është e lidhur me eksportet e ndaluara të Venezuelës. Pamje të publikuara nga autoritetet amerikane tregojnë forcat speciale duke zbritur nga helikopterët direkt në bordin e anijes, në një ndërhyrje të shpejtë dhe të koordinuar. Zyrtarë amerikanë konfirmuan se forcat detare të SHBA-së kanë marrë nën kontroll anijen Olina, e cila dyshohet se ishte pjesë e të ashtuquajturës “flotë fantazmë” që përdoret për të shmangur sanksionet ndërkombëtare ndaj naftës venezueliane. Komanda Jugore e SHBA-ve deklaroi se nuk ka strehë të sigurt për shkelësit e ligjit. Sekretarja e Sigurisë Kombëtare, Kristi Noem, e përshkroi Olinën si një tjetër anije të flotës së errët, e dyshuar për transportimin e naftës nën embargo. Sipas saj, tankeri ishte nisur nga Venezuela dhe po përpiqej të shmangte monitorimin amerikan, ndërsa ndodhet në listat e sanksioneve të disa shteteve. Ajo theksoi se ky veprim është pjesë e një strategjie më të gjerë për të frenuar rrjetet ilegale, që përfitojnë nga tregtia e ndaluar e naftës. Kjo është anija e pestë që SHBA-të kanë sekuestruar në javët e fundit, Tensionet në rajon, sipas mediave ndërkombëtare, pritet të rriten, pasi Uashingtoni sinjalizon se do të vazhdojë me kontrolle dhe sekuestrime të tjera, duke e kthyer Detin Karaibe në një pikë kyçe të përplasjes gjeopolitike për energjinë dhe sigurinë ndërkombëtare.