Presidenti i Serbisë, Aleksandar Vuçiç, tha se nuk ishte aspak i lumtur me reagimin e Departamentit Amerikan të Shtetit lidhur me propozimet që Aleksandar Vulin dhe Nenad Popoviç, që janë nën sanksione nga Shtetet e Bashkuara të Amerikës, të jenë pjesë e qeverisë së re të Serbisë. “Shpresoj që do të kemi marrëdhënie të mira me partnerët tanë amerikanë. Është jashtëzakonisht e rëndësishme që të kemi marrëdhënie të mira. Nuk jam i kënaqur me reagimin e tyre, por Qeveria e Serbisë është e zgjedhur nga qytetarët e Serbisë”, tha Vuçiç. Të mërkurën do të mbahet seanca e Kuvendit të Serbisë, ku do të diskutohet për zgjedhjen e Qeverisë së re. Ministër pa portofol është propozuar Nenad Popoviç, ndërsa zëvendëskryeministër, Aleksandar Vulin. DASH tha për Evropën e Lirë se SHBA-ja është “e zhgënjyer" nga propozimi i Vulinit dhe Popoviçit dhe shtoi se të dy mbeten nën sanksione, sepse qëndrimi i SHBA-së ndaj tyre është “i njohur mirë”. Sidoqoftë DASH tha se SHBA nuk luan asnjë rol në vendimet e personelit të Qeverisë së Serbisë. “Kjo do të thotë që kur vendosin sanksione ndaj dikujt, ne duhet të ulim kokën me përulësi dhe të themi; faleminderit që na informuat kush nuk duhet të jetë asgjë”, tha Vuçiç. Nenad Popoviç është nën sanksione amerikane që nga nëntori i vitit 2023, ndërsa sanksionet ndaj Vulinit u vendosën në korrik të të njëjtit vit. Të dy janë në “listën e zezë”, ndër të tjera, për shkak të lidhjeve të tyre me Kremlinin.