Perceptimet globale për SHBA-në janë përkeqësuar për të dytin vit radhazi dhe tani janë më të këqija se pikëpamjet për Rusinë, tregoi një studim vjetor mbi demokracinë i publikuar të premten, ndërsa politikat e Presidentit të SHBA-së Donald Trump vazhdojnë të tensionojnë aleancën e NATO-s. Fondacioni i Aleancës së Demokracive me seli në Danimarkë, i cili porositi anketën, tha se SHBA-të u emëruan gjithashtu më shpesh në përgjigje, si vendi që përbënte kërcënimin më të madh për botën, pas Rusisë dhe Izraelit. Anketa nuk hyri në detaje mbi kriteret e përdorura, por Aleanca e Demokracive thotë se qëllimi i saj është të mbrojë dhe të përparojë vlerat demokratike. "Rënia e shpejtë e perceptimit të Shteteve të Bashkuara në të gjithë botën është trishtuese, por jo tronditëse", tha themeluesi i aleancës dhe ish-Sekretari i Përgjithshëm i NATO-s, Anders Fogh Rasmussen. "Politika e jashtme e SHBA-së gjatë 18 muajve të fundit, ndër të tjera, ka vënë në pikëpyetje marrëdhënien transatlantike, ka vendosur tarifa të gjera dhe ka kërcënuar të pushtojë territorin e një aleati të NATO-s", shtoi ai. Tarifat e Trump, kërcënimet e tij të përsëritura për të marrë nën kontroll Grenlandën, që i përket një anëtareje tjetër të NATO-s, Danimarkës, një shkurtim i ndihmës amerikane për Ukrainën, si dhe lufta SHBA-Izrael kundër Iranit dhe rritja pasuese e çmimeve të naftës kanë trazuar thellësisht marrëdhëniet transatlantike. I zemëruar që vendet evropiane kanë refuzuar të dërgojnë marinat e tyre për të hapur Ngushticën e Hormuzit për anijet globale pas fillimit të luftës kundër Iranit, Trump tha në prill se po konsideronte tërheqjen nga NATO, duke e dobësuar më tej aleancën. Sondazhi i Indeksit të Perceptimit të Demokracisë, i cili rendit perceptimin e vendeve nga -100% në +100%, tregoi se perceptimi neto i SHBA-së kishte rënë në -16% nga +22% dy vjet më parë, duke e vendosur atë pas Rusisë në -11% dhe Kinës në +7%. Sondazhi i krye mes 19 marsit dhe 21 prillit, dhe u anketuan më shumë se 94 mijë persona në 98 vende.